ഓസ്കർ വേദിയിൽ അവതാരികയായി എത്തിയ ബോളിവുഡ് താരം ദീപിക പദുക്കോണിനെ പ്രശംസിച്ച് നടി കങ്കണ റണാവത്ത്. രാജ്യത്തിന്‍റെ പ്രതിച്ഛായയും അന്തസ്സും ഉയർത്തിപ്പിടിച്ച് സംസാരിക്കുക എന്നത് എളുപ്പമുള്ള കാര്യമല്ല. ഇന്ത്യൻ സ്ത്രീകളാണ് ഏറ്റവും മികച്ചവരെന്ന് ദീപിക തെളിയിച്ചുവെന്നും കങ്കണ പറഞ്ഞു.
“ദീപിക പദുക്കോൺ എത്ര മനോഹരിയാണ്. രാജ്യത്തിന്‍റെ പ്രതിച്ഛായ ഉയർത്തിപ്പിടിച്ച് വലിയ ആത്മവിശ്വാസത്തോടെ സംസാരിക്കുക എന്നത് എളുപ്പമുള്ള കാര്യമല്ല. ഇന്ത്യൻ സ്ത്രീകളാണ് ഏറ്റവും മികച്ചത് എന്നതിന്‍റെ തെളിവായി ദീപിക പദുക്കോൺ തല ഉയർത്തി നിൽക്കുന്നു,” കങ്കണ ട്വിറ്ററിൽ കുറിച്ചു. ഇതിന് പിന്നാലെ ദീപികയെ അഭിനന്ദിച്ച് നിരവധി പേരാണ് രംഗത്തെത്തിയത്.
കറുത്ത ഗൗൺ അണിഞ്ഞ് പഴയ ഹോളിവുഡ് സ്റ്റൈലിലാണ് ദീപിക ഓസ്കാറിന് എത്തിയത്. ഇതിന്‍റെ ചിത്രങ്ങളും വീഡിയോകളും സോഷ്യൽ മീഡിയയിൽ വൈറലായിരുന്നു. ഓസ്കാർ നിശയിൽ 16 അവതാരകരുണ്ടായിരുന്നു, അവരിലെ ഏക ഇന്ത്യന്‍ വ്യക്തിയായിരുന്നു ദീപിക. ഓസ്കാറിൽ മികച്ച ഗാനത്തിനുള്ള അവാർഡ് നേടിയ ആർആർആറിലെ ഗാനത്തിന്റെ പെര്‍ഫോമന്‍സിന് മുന്നോടിയായി ഗാനം പരിചയപ്പെടുത്തിയാണ് ദീപിക വേദിയിലേക്ക് പ്രവേശിച്ചത്. രസകരമായ രീതിയിൽ ഗാനത്തെ പരിജയപ്പെടുത്തി ദീപിക സദസ്സിന്റെ കയ്യടിയും സ്വന്തമാക്കി.
