കൊച്ചി: ബ്രഹ്മപുരം മാലിന്യ പ്ലാന്‍റിലെ പ്രശ്നങ്ങൾക്ക് കാരണം ചിലരുടെ അഴിമതിയോടുള്ള സ്നേഹം കൊണ്ടാണെന്ന് നടൻ ശ്രീനിവാസൻ. വർഷങ്ങൾക്ക് മുമ്പ് നഗരസഭയിൽ മാലിന്യ സംസ്കരണത്തിനായി ഒരു പദ്ധതി മുന്നോട്ടുവച്ച് നിരാശപ്പെടേണ്ടി വന്ന സുഹൃത്തും നിർമാതാവുമായ ഗുഡ്നൈറ്റ് മോഹൻ നേരിട്ട അനുഭവത്തെക്കുറിച്ചും അദ്ദേഹം സംസാരിച്ചു.
യന്ത്രസാമഗ്രികൾ വിദേശത്ത് നിന്ന് ഇറക്കുമതി ചെയ്യാമെന്നും ചെലവ് നടത്തി മാലിന്യം സംസ്കരിക്കാമെന്നും അതിന്‍റെ ബൈപ്രൊഡക്ട് മാത്രം നൽകിയാൽ മതിയെന്നും മോഹൻ നിർദ്ദേശിച്ചിരുന്നു. എന്നാൽ 10 ലോറി മാലിന്യം ബ്രഹ്മപുരത്തേക്ക് അയച്ച് 100 ലോറികളായി കാണിച്ച് പണം തട്ടേണ്ടതിനാലാണ് നഗരസഭ ഇത് അംഗീകരിക്കാത്തതെന്നും ശ്രീനിവാസൻ ആരോപിച്ചു.
